Ամանորը 1-ին բ դասարանում
Չկա ավելի սիրելի տոն, քան Նոր տարին: Երեխաների ամենասիրած տոնը՝ հրաշքներով լեցուն Ամանորը, շատ սպասված ու սիրված տոն է հատկապես փոքրիկների համար:Մանուկներն անհամբեր սպասում են, թե ե՞րբ իրենց դուռը կթակի Ձմեռ պապը հրաշագործ և կկատարի իրենց նվիրական ցանկությունները:
Ամանորի տոներին ընդառաջ 1-ին բ դասարանում (դասվար Ք. Սարգսյանի գլխավորությամբ) կազմակերպվեց միջոցառում <<Գալդ բարի, Նո´ր Տարի>> խորագրով: Դասվարի հիմնական նպատակն էր, որ երեխաներն ուրախանան և վայելեն Նոր Տարվա հրաշքները: Եվ ահա փոքրիկները ներկայացրին մի գողտրիկ հեքիաթ տոնածառի և անտառային համերաշխ կենդանիների մասին: Չէ՞ որ հեքիաթների դերը երեխաների զարգացման գործում բազմազան է. սկսած երևակայությունը զարգացնելուց մինչև ճիշտ խոսքի ձևավորումը:
Փոքրիկներն էլ անձնավորում էին իրենց սիրելի հեքիաթի հերոսներին, նախապատրաստվում էին այդ հրաշալի տոնին: Պատրաստություններն սկսում են եղևնու ընտրությունից: Եվ ահա արջը, նապաստակը, գայլն ու ոզնին որոշեցին գնալ անտառ և եղևնի ընտրել: Նրանք միասին են ընտրում եղևնին ու խաղալիքները, դրանց զարդերն ու գույները: Ոզնին ասում է, որ փոքրիկ է եղևնին, բայց իրենց սրտերը թող լինեն մեծ ու բարի: Վերջապես ընտրում են անտառի ամենագեղեցիկ եղևնին, իսկ վերջինս սպասում է, թե ով իրեն կզարդարի: Եվ ոզնին, արջն ու գայլը, նապաստակը, գող աղվեսն ու չար տատիկը գործի են անցնում:
Կենդանիներն իրենց միասնությամբ՝ արջն աջ կողմից, գայլը՝ ձախ, նապաստակն էլ ետևից, բռնում են չար տատիկին, որն ուզում էր վառել եղևնին, կապում են ծառից ու փրկում տոնածառը, զարդարում այն: Ծաղրածուն ազդարարում է Ամանորի բարի տոնը:
Միջավայրը լի էր տոնական քնքուշ ու նուրբ շնչով: Բարձր տրամադրությունը, ուրախ երգն ու բեմականացումը, բանաստեղծություններն ու բարեմաղթանքները հնչում էին փոքրիկ հրաշքների շուրթերից: Նրանք ուրախություն և սեր ցանկացան բոլորին և Աստծուն ուղարկեցին իրենց բարեմաղթանքները, որ 2015 թվականին ո´չ ոք չտխրի, ո´չ մի երազանք անկատար չմնա, որ 2015 թվականն իր հետ բերի ժպիտներ, երջանկություն և խաղաղություն, անկեղծություն ու ազնվություն բերի: Նրանք հավատում էին ամանորյա հրաշքներին, երբ գալիս է Ամանորը...
Միջոցառումը հաջողված էր և ուսանելի:
